|
Saturnus ist der oberst planete und leuft durch die 12 zeichen in 30 jaren und ist in eym iglichen zeichen 2 1/2 jare, und hat ser großen gewalt in der woge, want er ist sin erhohunge und hat noch grossern in dem steynbocke und in dem wasserman, want die zeichen sint sine huser, doch hat er in dem wasserman mer gewalt dan in dem steynbocke und hat unglucke in dem krebse in dem lewen und in dem wieder und frauwet sich in dem wassermont. der planet ist bose und widerwirtig der naturen und allen lebendigen dingen. Und sunderlich so er richtet und gewalt hat, so verderbet er alle lebendige dinge mit huger dot und arbeit. Syn kinder sint brüne und hant eynen dynnen bart eyn synnewels heupt bleicher farben und wonent gern by wasser oder in erde. Er lachet selten. Geschrunden füße, eyn cleyn hertze cleyn brust, grosse lange brawen. Von natur eyn diep, cleffig hessig lugenhaftig, richtig in zorne, nyt gut zu erzurnen und doch nach zorn mulich zu versünen; sins eigen guts karg, fremdes guts myld; frech, mit durftigen augen als ein morder, eyns ungestymmen hyrns, boses willen, ungerne by den luden und treit gern unsauber bose gewant, swartze farbe und grawet schiere und hat eyn bose gestalt. Er hat nit lust des libes, listig hessig und ungetruwe, trege langsinn in allen dingen und hat nit lust mit wiben. Er hat alzit sorge und anxst und gedenket und redet zu ihm selbst und so er gat, so ist sin angesicht alles geneigt zu der erden. Er ist wol gespreche und nympt selten eyn gut ende, syn kinder werdent gewonlichen erhangen. Die nature haben sie von dem planeten Saturno.
Tübinger Handschrift von 1404
|
