|
Ingeniosi dispensatoris et ingenui dinoscitur interesse talem de rebus temporalibus sollicitudinem dispensationis gerere, qualem honestati similiter et saluti viderit utiliter convenire. Hac siquidem considerationis materia sanctum Magdeburgense capitulum sufficienter instructum, licet ex prebendarum amministratione consueta decenter haberet alimenta que sufficerent competenter, verumptamen cupiens ad commoda honestatis et utilitatis ulteriora procedere secundum incrementa possessionum ecclesie, redditus quosdam sibi noviter accrescentes et veteres redditus circumquaque diffusos, inferius annotatos, in usum vini convertens, eos taliter tam honeste quam non inutiliter dispensavit, statuens ex consensu unanimi de redditibus huiusmodi unicuique fratrum presentium dimidiam stopam boni Herbipolensis vini diebus singulis ministrari adiciensque, quod ab hora inchoationis misse maioris in maiori ecclesia usque ad tempus, quo prandendum fuerit, deputatus ad hoc famulus intra septa claustri ante cellarium, in quo communis vini facta est reservatio, presens erit exspectans tunc canonicorum nuntios, quorum apportatas amphoras de mensura vini solita impleat et statuta. Vinum ibi presentabitur et non alibi, si infra tempus prehabitum a dicto cellario sit allatum. Verum si a Magdeburgensi civitate aliquem canonicum absentem esse contigerit et ad civitatem advesperascente die infra sonantem campanam completorii ultimam, hoc est secundam, ipse redierit, ex hac mora vinum suum non negliget sed habebit. Siquidem1 procurator vini seu obedientiarius vetus vinum usque pridie beati Martini fratribus procurabit et in hoc pridie Martini piissimi de dimidia stopa veteris et de dimidia novi vini sive musti, sic vetus vinum licentians et novum inchoans, ipsis liberaliter providebit. Nec pretereundum est leviter, ymmo servandum tenaciter, quod, quoniam maiora festa, scilicet natale Domini, Pascha, Penthecoste ac festum beati Mauritii, promerentur ampliori honoris et gratie beneficio celebrari, vinum redolens et suave pro sua representans redolentia quasi ymaginem apothece, puta Bozanum, incipiendo ab istorum festorum vigiliis et continuando ad octavas eorum pro decenti consolatione fratrum hiis erit in festis efficiente hoc vini obedientiario cum bona diligentia ministrandum. Si vero, quod absit, copia vini huius non possit haberi, comparabitur loco eius pro celebri usu fratrum elegantius vinum et melius, quod poterit inveniri. Insuper est notandum, quod in sexta feria ante assumptionem beate virginis vini procurator annis erit singulis eligendus, sua tamen usque pridie beati Mauritii continuabit de vino servicia antecessor obedientiarius, sed in hoc pridie Mauritii primo serviet de vino successor et noviter institutus. Ad emptionem quoque vini sunt hii redditus et sic siti: extra opidum Vrose in salinarum fontibus centum marce, item in obedientiis sequentibus, videlicet in Guzsten octo marce, de Gramestorp sex marce, item in Gozzeke decem mansi solventes decem choros tritici et decem choros ordei, in Conre quatuor mansi et dimidius solventes quatuor choros et dimidium tritici et quartum dimidium chorum siliginis et quinque quadrantes ordei et unum chorum avene et pullos sedecim annuatim, in Brundal tres inansi quatuor marcas, uno fertone minus, solventes; preterea dummodo de decima in Olvenstede non negligantur sed expediantur servitia antiquitus instituta et anniversarii et si qua sunt similia, prout in locis diversis inveniuntur conscripta, hec tota decima, quatuor choris tritici dumtaxat exceptis ad capellam sancti Blasii perpetuo deputatis, ad vini procurationem est similiter numerata; nec minus silva Schilde non longe distans a castro Nigrebbe, de qua tamen venerabilis domini Roperti Magdeburgensis archiepiscopi anniversarius agetur memoriter et festum beate Adelheidis cum legenda sua et hystoria peragetur sollempniter, sicut confectum super hiis privilegium continet evidenter, proviso nichilominus, quod vini procurator, qui pro tempore fuerit, silvam dictam resecari particulariter faciet et iubebit, provide hanc dividens et distinguens in partes suas de anno in annum iterum resecandas, nec devastabit eam autem tantum, ut successor obedientiarius propter tonsuram lignorum nimiam aliquod sentiat detrimentum. Hec acta sunt Magdeburg in indicto generali capitulo, venerabili viro Gunthero electo presidente Magdeburgensi ecclesie, presentibus Walthero decano, Bernardo cellerario, Burchardo camerario, Heinrico de Wederde, Godefrido, Sifrido cantore, magistro Ritzardo, Hermanno de Glichen et ceteris, anno Domini mo.cco.lxxviijo, xvo Kal. Junii, et sigillo capituli confirmata.
|
