|
Primus ejus fundator putatur fuisse Waltgerus. Habitavitis, prout Latina verba sonant, in monte Dorenberg / ex Patre Dedda, et matre Ecwi Christianis natus, possessionibus et facultatibus ditissimus. Habuit avum Adolphum, gentilem, et aviam paganam. Adolphus ille fuit Secretarius Wetekindi Regis Saxonum, qui cum ad Carolum Magnum piscationis et venationis dona misisset, ab eo fuit accersitus, et sacris sermonibus ita imbutus et conversus, ut lavacro salutis fuerit ablutus, et baptisatus, eo tempore, quo Winfridus, qui et Bonifacius natione Brito, in Gallia, Suevia, Francia, Hassia, et Thuringia verbum Domini praedicavit. Waldgerus claruit tempore Ludovici Pii, Caroli Magni filii, qui Patri in Imperio successit. Is postquam à Parentibus solicitè educatus est, virtutum operibus et pietate in pueritia florere caepit, et hujus mundi voluptates vilipendere: indeque constituit patre et matre mortuis, omne suum patrimonium in honorem Dei conferre. Ideoque Anno 832. erexit aedem Ecclesiae, Hervordiae eo loco, quo Capella Waltgeri conspicitur, ubi in superficie reperiuntur haec verba: Princeps hujus terrae Waltgerus, primus fundator Ecclesiae Hervordensis. In ingressu sive vestibulo ejusdem Capellae haec leguntur. Nobilis Litehardis de Bickenen Abba: hanc basilicam Anno Domini 1356. reparavit.
|
