|
Pater noster aus dem Weißenburger Katechismus
9. Jahrhundert Weißenburg rheinfränkisch
Fater unser, thu in himilom bist, giuuihit si namo thin. quaeme
richi
thin. uuerdhe uuilleo thin, sama so in himile endi in erthu. Broot
unseraz emezzigaz gib uns hiutu. endi farlaz uns sculdhi
unsero, sama
so uuir farlazzem scolom unserem. endi ni gileidi unsih in
costunga.
auh arlosi unsih fona ubile.
Fater unser, thu in himilom bist, giuuihit si namo thin. Gotes
namo ist
simbles giuuihit: auh thanne uuir thiz quedhem, thanne bittem
uuir,
thaz sin namo in uns mannom uuerdhe giuuihit thuruh guodiu
uuerc.
Quaeme richi thin. Richi gotes ist simbles endi eogihuuar: thes
bittem
uuir thoh, thanne uuir thiz quedem, thaz gotes richi si in uns
endi thes
diufles giuualt uuerdhe arfirrit fona uns.
UUerdhe uuillo thin sama so in himile endi in erthu. Thes sculun
uuir
got simbles bitten, thaz sin uuilleo uuerdhe samalih in erdhu in
mannom, soso her ist in himile in engilom, cithiu thaz man in
erthu
sinan uuilleon giuuurchen megin sama so engila in himile
magun.
Broot unseraz emetzigaz gib uns hiutu. Allo mannes thurfti
sintun in
themu brotes namen gameinito, thero er ci thesemo
antuuerden libe
bitharf. bithiu scal man dago gihuueliches thiz gibet singan, so
huuer
so uuili, thaz imo got gidago sinero thurfteo helphe.
Indi farlaz uns sculdhi unsero sama so uuir farlazzem scolom
unserem. So huuer so thiz quidhit, so bitharf thaz er so due so
her
quithit, huuanda her fluochot imo mer thanne her imo guodes
bitte,
ibu her so ni duat so her quidhit: huuanda so huuer so
andhremo
arbolgan ist endi thiz gibet thanne singit, ther bidit imo
selbemo
thanne ubiles.
Indi ni gileiti unsih in costunga. Ni leitit got eomannan in ubilo
thohheinaz, uzzar thanne her then man farlazzit, so ist her sar
in
costungom. thaz meinit thaz uuort, thaz her unsih ni farlazze,
cithiu
thaz uuir in ubil gileitte ni uuerdhen.
Auh arlosi unsih fona ubile. In thesemo uuorde ist bifangan
allero
ubilo gihuuelih thero manne giterian megi. bithiu so huuer so
thiz gibet
hluttru muatu singit, gilouban scal her, thaz inan got thanne
gihorie:
huuanda her ni bitit thar ana ellies eouuihtes, nibu thes got
selbo
giboot ci bittanne, endi thar sintun thoh allo mannes thurfti ana
bifangano.
|
