Kleeblattklopfer

Daß Hauß Würtenberg soll verbleiben gerühiglich bey erlangter possession der Herrschafften Weinßperg / Newstatt / vnnd Meckmühle. Soll auch ferners in alle vnd jede weltliche vnnd geistliche Güter vnd Gerechtigkeiten / welche dasselbe ein: vnd andern Orts vor diesem Kriegeswesen in Besitz gehabt / vnd in specie beyder Herrschafften Blawbeuern / Achalm vnd Stauffen / sampt Zugehörungen / vnd vnderm praetext darzu gehörigen eingenommene Güter / jnsonderheit bey der Statt vnd Gebieth Göppingen / vnd Flecken Pflumern / der Vniversitet Tübingen / Christlöblich vermachten Einkünfften [restituirt werden]. Es soll auch widerumb einnehmen die Herrschafften Heydenheimb vnd Oberkirch / die Stätte / Balingen / Tutlingen / Elbingen vnd Rosenfeld / wie auch Schloß vnd Dorff Neidlingen / mit seiner Zugehörung / ingleichem Hohentwyhl / Hohenasperg / Hohenaurach / Hohen-Tübingen / Albeck / Hornberg / Schiltach / mit der Statt Schorndorff. Man soll es auch restituiren in die Collegiat-Stiffter Stutgard / Tübingen / Hernberg / Göppingen / Bachnang / wie auch in die Apteyen / Probsteyen vnd Clöster / Bebenhausen / Maulbrunn / Anhausen / Lorch / Adelberg / Denckendorff / Hirschaw / Blawbeuren / Herprechtingen / Murhard / Alberßbach / Königßbrunn / Herrenalb / S. Georg Reichenbach / Pfullingen vnnd Liechtenstern / oder Marien-Cron / vnd dergleichen / sampt allen entwanten Documenten / Jedoch mit Vorbehalt allen vnnd jeden deß Hauses Oesterreich / vnd Würtenberg / an obgedachten Herrschafften Blawbeuren / Achalm vnd Stauffen / geführten Rechten / Handlungen / Exceptionen vnd Beneficien.