|
Vrentlike grote vorgescreven an mynen leven vruent. Hildebrant juwen breyff, 2 dage na nijars dage hergescreven, hebbe ik wol vorstan int erste umme de 40 ℔ gr., de wil ik, ofte Got wil, untrychten unde ok de 60 nobelen, de Hildebrant van dem Bokel hir over henz laten kopen. Item so moet ik de 50 Aresche darumme vorkopen, de en solen nicht mer gelden wellen op desse tyt den 6 mark myn 8 schot unde ik geve se dar unmaten node umme, doch ik besorge my (se) solen nicht mer gelden wellen. Vortmer umme de 2 terlink Herentalsche laken, der en es my noch men 1 gekomen, de anderen es to dem Suende bevroren alzo ik jue wol er gescreven hebbe to Lubeke wart. Ok alzo gi my scryven, dat ik 2 Herentalsche sole geven vor 1 schippunt wasses, efte gy en konen nue nicht wol beholden, des so wetet, dat ik des nicht doen en kan, wante er en wel neimant darvor nemen. Ik hebbe er 15 vorkoft ut 1 terlinge, de my komen es, darvan stet op paschen to betalen 140 mark, de solen wol utkomen by 23 mark; al weren se myn gewesen, ik hedde se nicht bet weten to vorkopen noch ter tyt, wat hirnest schein mochte, des wet ik nicht. Vortmer, alzo umme de Trechtesche, der wel neimant to borge, ik swige, vor war ik wolde se gerne vorkopen, ik kan eynen man nicht darto bryngen, de my ychtes wat beyden wel darvor. Vortmer der Lentselschen hebbe ik 1 terlink vorborget op paschen, dat stucke vor 14 mark 1 fr. Item alze gi my scryven, dat ik jue scryven sole, wat laken hir best wellen tegent vorjaren, des en (wet) ik nicht; wat men an laken leget, dat es al vorloren, wante se en wellen dar nicht na gelden dat se stan, dyt moge gi lychte ok wol horen van anderen luden, de ere Aresche geven hebben vor 5 mark 16 scot., Alstedesche myn den 8 mark, Oldenarsche nicht vele duerer den 7½ mark, Meddelbuesche myn den 7½ mark, Kondytsche 5 mark, Tornesche 6½ mark; ok werden hir de Mestensche to herweste gegeven vor 10 mark op paschen to betalen. Hirby so moge gi merken, dat hir neine bote van laken en es. Wo et werden wel op ten somer, dat wet neimant, et es hir gut gewesen.
|
