|
We Bernhard von der gnade Goddes vorste tu Anhalt, greve tü Asschanien, herre tü Berneburch, don wetlik alle den, de dissen brif syen oder hören lesen, dat we ghededinget hebben mit deme erbaren vorsten hertogen Wilhelme von Brunswik unde von Lüneburch, dat we Saffen unse dochter ome geven scolen tü ener echten vruwen, is dat we dat behalden mögen in deme hove tü Rome von deme pawese twisgen hir unde der utgande pingestweke, de nilkes tü körnende sint, dat de magescap, de twisgen ome unde unser dochter is, unde de vruntscap unde hanttrüinghe, de twisgen hertogen Ernste von Brunswik unde ore gededinghet was tum echte, nicht en scade. Vormochte ok unse herre byscop Otte von Magdeburch disse vorscrevene ding ome unde unser dochter tü orlovene von gnade wegene des paweses, unde wenne we dissem vorbenomeden hertogen Wilhelme twedusent mark lodiges silvers vorwisset hebben also, dat ome genoghe, so scal he darna, alse we dat orlof erkregen hebben, binnen twen maneden unse dochter nemen tü ener echten vruwe alse verne, als et ome unde ore nene echte nod beneme, de me bewisen möge. Benimt id aver en echte nod, des God nicht en wille, wenne se von der echten nod untbunden würden, so scole we beyderwegene disse vorgenanten ding vultyen an allerleyge vortoch. Ok scal he unser dochter maken tü lifgetucht alle iar virhundert mark geldes lodeges silvers unde ene siner vesten. Dat we alle disse vorscrevene ding stede unde gans willen halden, des hebbe we unse ingesegel an dissen brif laten hangen.
|
